Bíó í sundlauginni á Laugum

Síðastliðinn laugardag, 14. september, var myndin Back to the Future sýnd í sundlauginni á Laugum á tæplega 40 fermetra tjaldi. Systkinin Eyþór Alexander og Birgitta Eva skipulögðu viðburðinn. Að sögn Eyþórs gekk fyrsta sýningin nokkuð vel. „Þetta tókst mjög vel og allt gekk upp en það hefðu mátt koma aðeins fleiri“. Fyrirtækið E-max stóð fyrir þessari bíósýningu, en það eru Eyþór Alexander og Ragnar Yngvi sem reka það saman.

Eyþór Alexander, annar eiganda E-max

„Við sjáum um miðasölu á netinu og erum með hljóðkerfaleigu. Leigjum öðrum hljóðkerfi fyrir viðburði og svo komum við sjálfir með hljóðkerfi og setjum það upp fyrir viðburðinn“, segir Eyþór.

Aðspurður hvort það verði fleiri sýningar í vetur segir Eyþór að það muni koma í ljós, allir viðburðir á þeirra vegum verða auglýstir fyrirfram.

Allar frekari upplýsingar um E-max má finna á www.e-max.is

 

 

Haustferð til Vopnafjarðar

Fyrsti hefðbundni skóladagur vetrarins var í gær, mánudaginn 2. september. Það hefur verið stíf dagskrá síðastliðna daga, en nemendur fóru í haustferð til Vopnafjarðar á föstudaginn, þar sem gist var í eina nótt. Áður en haldið var í ferðalagið var búið að skipta nemendum niður í nokkur lið, og áttu liðin að leysa allskonar þrautir og fá stig fyrir, á leiðinni til Vopnafjarðar og aftur heim. Tvær rútur lögðu af stað frá bílaplani skólans seinnipart föstudags og leiðinni var haldið beint til Húsavíkur þar sem nemendur fengu tækifæri til að kaupa skólabækur fyrir veturinn. Næsta stopp var Ásbyrgi þar sem liðin nældu sér í stig, næst var stoppað á Þórshöfn, og varð sú ferð svo fræg að við komumst á Facebook síðu sjoppunnar í bænum.

Þegar við vorum komin á áfangastað var öllu mokað út úr rútunum og grillað ofan í mannskapinn. Þeir sem vildu fóru í miðnætursund, en aðrir voru eftir í íþróttahúsinu og fóru í leiki og annað hópefli. Nemendur fengu góðan tíma til að athafna sig morguninn eftir, en við lögðum ekki af stað frá Vopnafirði fyrr en uppúr 14. Leikirnir héldu áfram, og byrjuðum við á því að fara í Sandvík þar sem liðin kepptu í kastalagerð og síðasta stoppið var hjá Dettifossi. 

 

Skólinn er loks að hefjast!

Undirbúningur skólaársins í fullum gangi og allt að verða klárt fyrir veturinn. Nú eiga allir nemendur og forráðamenn að vera búnir að fá sent upplýsingabréf þar sem farið er yfir helstu atriðin fyrir komandi skólaár.

Það sem þú þarft að vita:

  • Heimavistir verða opnaðar 28. ágúst klukkan 13:00 og nemendur sækja lykla og skrifa undir húsaleigusamning á skrifstofu skólans.
  • Best er að nemendur séu búnir að koma sér fyrir á heimavist fyrir skólasetningu.
  • Skólasetningin verður 28. ágúst klukkan 18:00 í íþróttahúsi skólans.
  • Foreldrar og forráðamenn velkomnir á skólasetningu og boðið að þiggja veitingar að henni lokinni.

Þróttó

Fimmtudaginn 29. ágúst byrjar skólahald og þá er mæting í morgunmat 8:40 og þaðan liggur leiðin yfir í Þróttó á fyrsta skólafund vetrarins, kl. 9:10.

Nýnemadagarnir okkar kallast „Brunnur“  og þessir dagar verða í gangi frá fimmtudegi – sunnudags. Ætlast er til þess að nemendur mæti þessa daga því það er nauðsynlegt að nemendur kynnist hver öðrum, sem og starfsfólkinu á þennan óhefðbundna og skemmtilega hátt.

Annars erum við orðin spennt að hitta ykkur og vonum að þessi vetur verði skemmtilegur og lærdómsríkur.

-gotta

Nýstúdentar brautskráðir

Image

Laugardaginn 18. maí voru 24 nýstúdentar brautskráðir frá Framhaldsskólanum á Laugum í frábæru veðri.

Tveir nemendur útskrifuðust af íþróttabraut, þrír af náttúruvísindabraut, átta af félagsvísindabraut og 11 af kjörsviðsbraut af jafnmörgum kjörsviðum sem voru búfræði, menntunarfræði, tónlistarflutningur, náttúrufræði, sjúkraliði, forritun, rafvirkjun, hússtjórn, kvikmyndagerð, stálsmíði og söngur. Leon Ingi Stefánsson útskrifaðist með hæstu einkunn nýstúdenta með einkunnina 8,27 og fékk bókagjöf frá Jarðböðunum við Mývatn. Leon hlaut einnig niðurfellingu skólagjalda í HR haustið 2019 fyrir árangur sinn í raungreinum.

Rúmlega 300 manns voru við athöfnina og settu fjölmennir eldri útskriftarárgangar svip sinn á samkomuna, héldu ræður og færðu skólanum gjafir. Var þar bæði um að ræða eldri gagnfræðinga sem og stúdenta. Að athöfn lokinni var kaffisamsæti í Gamla skóla.

Laugaskóli óskar öllum nýstúdentum til hamingju með áfangann og þakkar öllum sem sóttu hann heim fyrir komuna og hlýhug til skólans.

Páskaferð

Image

Nemendur Framhaldsskólans á Laugum fóru í stutta námsferð um páskanna. Sex nemendur ásamt kennara heimsóttu skóla í norður Frakklandi, Saint Joseph Notre Dame College. Þar var unnið í tvo daga á rannsóknarstofu með DNA og Brönugrasafræ. Síðan var farið í tvo daga í íþróttamiðstöð og tekist á við fjölbreytta dagskrá.

Brautskráning 2019

Image

Ágætu Þingeyingar og velunnarar skólans.

Brautskráning nýstúdenta fer fram við hátíðlega athöfn í íþróttahúsinu á Laugum laugardaginn 18. maí kl. 14:00.
Við bjóðum ykkur öll hjartanlega velkomin að gleðjast með okkur og þiggja kaffiveitingar að athöfn lokinni í matsal skólans.
Þennan sama dag fer aðalfundur hollvinasamtakanna Vinir Laugaskóla fram í íþróttahúsinu kl. 17:00. Velunnarar skólans eru hvattir til að mæta á þann fund.

Bogfimi á Laugum

Image

Nemendur í bogfimi nýttu góða veðrið sem var til að skjóta utanhúss. Lokatíminn var á þriðjudaginn síðasta (7. maí) þar sem nemendur kepptu sín á milli. Iðunn Klara setti fyrstu örina í keppninni í miðjuna (10 stig), keppendur fá nýtt skotmark í upphafi keppninnar og þykir frábært að setja fyrstu örina í miðjuna 🙂 

Framhaldsskólinn á Laugum er Mannréttindaframhaldsskóli ársins 2018

Image

Við í Framhaldsskólanum á Laugum tókum að venju þátt í bréfamaraþoni Amnesty International, bréf til bjargar lífi, í desember síðast liðnum.  Við fórum með sigur af hólmi í framhaldsskólakeppninni í flokknum flestar undirskriftir miðað við nemendafjölda og ber skólinn því titilinn Mannréttindaframhaldsskóli ársins 2018.  Við erum að sjálfsögðu afar stolt af þessum titli og fögnum því að nemendur og starfsfólk láti sig mannréttindi varða og sýni það í verki.

Fyrir nokkru söfnuðust nemendur og starfsmenn saman í matsal skólans til að taka á móti viðurkenningarskjali og glæsilegum farandgrip.  Það voru þær Hera og Þórkatla frá Íslandsdeild Amnesty International sem komu færandi hendi, og færðu okkur einnig dýrindis köku í tilefni dagsins.

Það var Eyþór Kári Ingólfsson, forseti nemendafélagsins sem tók við verðlaunagripnum úr hendi Heru Sigurðardóttir.  Með á myndinni er Jóhanna Eydís bókasafnskennari sem sá að mestu um framkvæmd bréfamaraþonsins.

Samráðsfundur um norðlensk skólamál

Image

Ársfundur framhaldskólanna á Norðausturlandi, SAMNOR, var helgaður samfellu skólastiga. Til fundarins var boðið fulltrúum sveitarfélaga á svæðinu, stjórnendum grunnskóla og símenntunarmiðstöðva. Inngangserindi voru haldin um efnið frá sjónarhóli grunnskóla, framhaldsskóla, háskóla og símenntunarmiðstöðva. Síðan var pallborð með þátttöku fyrirlesara. Fundurinn tókst mjög vel og voru þátttakendur sammála um að á þessu svæði væru einstakar aðstæður til nýbreytni í samstarfi skólastiga.

Rætt var um sveigjanleg skólaskil grunn- og framhaldsskóla, að nemendur gætu hafið nám í einstökum greinum fyrir útskrift úr grunnskóla eða lokið útskrift fyrir lok 10. bekkjar. Einnig var rætt um námsmat og hvaða upplýsingar fælust í þeim. Á mörkum háskóla og framhaldsskóla var rætt um innihald stúdentsprófsins og þann mikla sveigjanleika sem er í framhaldsskólanum til undirbúnings undir háskólanám eftir gildistöku nýrrar námskrár og velt fyrir sér hvaða kröfur það leggur á háskóla um að skilgreina þarfir um nám fyrir háskóla. Rætt var um samstarf framhaldsskóla og símenntunarmiðstöðva, raunfærnimat, aðlögun brotthvarfsnemenda að námi og sértækt nám í tengslum við atvinnumarkaðinn.

Rædd voru samstarfsverkefni sem þegar eru í gangi á milli skóla og skólastiga og mikill áhugi kom fram um frekari samvinnu um breytingar og þróun í samstarfi á svæðinu. Umræðan bar það með sér að hér var verið að hefja samtal sem mun áreiðanlega hafa áhrif á þróun skólamála á svæðinu.

Framhaldskólarnir í SAMNOR eru: Framhaldskólinn á Húsavík, Framhaldskólinn á Laugum, Menntaskólinn á Akureyri, Menntaskólinn á Tröllaskaga og Verkmenntaskólinn á Akureyri.