Brautskráning vorið 2020

Image

Guðrún Gísladóttir, dúx Framhaldsskólans á Laugum

Þann 16. maí síðastliðinn voru 16 nýstúdentar brautskráðir frá Framhaldsskólanum á Laugum. Þessi brautskráning var sérstök að því leytinu til að nýstúdentarnir fengu skírteini sín send í pósti en vegna kórónaveirufaraldursins var hefðbundinni útskriftarathöfn frestað til 29. ágúst næstkomandi. Þá vonumst við til að eldri afmælisárgangar heimsæki skólann og þá munu nýstúdentar einnig fá viðurkenningar fyrir námsárangur, félagsstörf og önnur góð verk. Hæstri meðaleinkunn á stúdentesprófi 2020, 8,04, náði Guðrún Gísladóttir og er hún því dúx Framhaldsskólans á Laugum þetta árið.

Breyttar áherslur í skólastarfi

Image

1) Minni mæting í fagtíma
Skóladagurinn samanstendur af hefðbundnum fagtímum og hóp- og námstímum þess á milli. Fagtímar eru fjölbreyttar kennslustundir á stundatöflu merktar tilteknum námsgreinum, allt frá hefðbundnum fyrirlestrum til umræðutíma og vendikennslu. Til að halda utan um námið hagnýtum við okkur námskerfin Moodle og Teams. Með breyttum kennsluháttum og tæknilausnum mæta nemendur nú í mun færri fagtíma en áður.

2) Nám á eigin forsendum
Nemendur eru með samfelldan skóladag og hver nemandi hefur sína persónulegu vinnustöð í opnu rými þar sem þeir geta unnið í námstímum, sem gefur möguleika á sveigjanlegra námsumhverfi. Í námstímum skipuleggja nemendur sjálfir, með aðstoð kennara, hvaða verkefnum þeir vinna að og geta þannig varið meiri tíma í þær námsgreinar sem þeir vilja leggja áherslu á hverju sinni.
Þetta fyrirkomulag kallar á aukna ábyrgð nemenda á námi sínu, veitir þeim sjálfstæði og reynir á hæfni þeirra til að meta styrkleika sína og veikleika. Með þessu móti geta nemendur einnig í meira mæli valið þær vinnuaðferðir sem henta þeim best. Ákveðnir námsáfangar eru í boði hverju sinni sem nemendur geta tekið á þeim hraða sem þeir ráða við. Ef þeir kjósa að hraða námi sínu krefst það meira vinnuframlags utan hefðbundins skóladags.

3) Persónuleg leiðsögn
Hóptímar eru blanda af fagtímum og námstímum. Segja má að stundatafla Laugaskóla sé fljótandi að vissu marki því hún er breytileg frá viku til viku. Hóptímar í hálfan dag eru fjórum sinnum í viku þar sem allir nemendur, auk nokkurra kennara, eru saman í einu.
Hóptímar hefjast á standandi fundi þar sem nemendur gera grein fyrir áætlunum sínum í náminu þann daginn. Að standandi fundi loknum fara sumir að vinna að verkefnum sínum meðan aðrir fara í úttekt, sem er að yfirgefa hóptíma til að sinna ákveðnum verkefnum undir stjórn kennara. Tímalengd úttekta í hóptíma er mismunandi til að nýta tíma kennara og nemenda sem best. Í hóptíma geta nemendur einnig pantað aðstoð frá ákveðnum kennara. Með þessum hætti njóta nemendur persónulegrar leiðsagnar gegnum allt framhaldsskólanámið.

4) Sveigjanleiki í námi
Almenn ánægja ríkir meðal nemenda með námsfyrirkomulagið og margir þeirra hafa nefnt sveigjanleika sem mikinn kost. Nemendur ákveða ekki aðeins hvaða námsgrein þeir vinna hverju sinni heldur geta þeir valið milli stofa til að vera í. Mismunandi vinnuaðstaða er í boði. Hægt er að vera á sínu vinnuborði, í hópvinnuherbergjum eða á bókasafninu. Sumir kjósa að vinna þar sem er algjört næði meðan öðrum hentar betur að hafa smá umgang. Stundum getur líka verið ágætt að setjast í sófa o.s.frv. Það er semsagt undir nemendunum sjálfum komið hvar þeir vinna og í hverju. Kostir þessa sveigjaleika koma ekki síst fram þegar aðstæður breytast í heiminum eins og við erum að upplifa núna því þá eru nemendur og kennarar við skólann vel í stakk búnir að aðlagast og halda sínu striki í námi og kennslu.

5) Færni til framtíðar
Framhaldsskólinn á Laugum er símatsskóli sem þýðir að nemendur taka próf, gera ritgerðir og leysa verkefni með jöfnum hætti yfir námstímann. Verkefnin sem nemendur vinna yfir önnina eru fjölbreytt. Samfelldur skóladagur, breytilegir kennsluhættir, sveigjanleiki og persónuleg nálgun er öllu ætlað styðja við þá vinnu.
Í skólanum höfum við þá hæfni og þekkingu að leiðarljósi sem nýtist í samfélagi framtíðarinnar. Nám og kennsluhættir eru í örri þróun og störf munu breytast og sum hverfa. Framtíðin kallar á fólk sem hefur færni til að vinna með öðrum, takast á við breyttar aðstæður og vera sveigjanlegt. Áherslan verður því æ meira á sí- og endurmenntun, sjálfstæði og getu til að leysa alls konar ólík verkefni og hugsa út fyrir kassann. Við erum stolt af því að kennsluhættir í Framhaldsskólanum á Laugum hafa verið þróaðir sérstaklega til að efla þessa þætti hjá nemendum.

Breyttur opnunartími á skrifstofu

Nú er önnur vika utan skóla hálfnuð og allt gengur samkvæmt áætlun. Örlitlar breytingar eru á opnunartíma skrifstofunnar og viðveran minni en á hefðbundnum skóladögum, vegna þess er ekki alltaf víst að svarað verði í síma 464-6300 en  við bendum á að það er hægt að hringja beint í símanúmer Bjössa skólameistara, 693-1774. 

Einnig er alltaf hægt að senda tölvupóst á gotta@laugar.is, nemendur geta að venju alltaf sent skilaboð á Teams. Önnur netföng starfsmanna eru að finna hér 

Við erum ánægð með ykkur og vonum að þið séuð öll að fylgjast með okkur á TikTok (@laugaskoli) – þar má sjá bæði starfsmenn og kennara Laugaskóla finna sér ýmislegt, misgáfulegt, að gera. Það er jú nauðsynlegt að líta upp úr bókum, teygja úr sér og hlæja smá. 

Að lokum koma nokkur góð ráð fyrir nemendur í fjarnámi

1) RAMMAÐU INN DAGINN
Það skiptir miklu máli að halda áfram skólarútínunni. Fara á fætur á morgnanna og fara að sofa á skikkanlegum tíma. Hugaðu að fjölbreyttri næringu og hreyfingu.

2) FYLGSTU MEÐ KENNSLUVEFJUM
Farðu reglulega inn á kennsluvefi þeirra áfanga sem þú ert í. Mættu í fjarfundi þegar ætlast er til þess og vertu í góðu sambandi við kennarana þína.

3) SKIPULEGGÐU ÞIG
Skráðu niður öll þau verkefni sem þú þarft að vinna á einn lista. Skrifaðu niður skiladaga. Útbúðu raunhæfa tímaætlun fyrir daginn. Hvað ætlarðu að gera hvenær!

4) LEITAÐU AÐSTOÐAR
Ef eitthvað er óljóst og svörin er ekki að finna á kennsluvef, leitaðu þér þá strax aðstoðar hjá kennara, t.d. kennara á vakt á Teams. Náms- og starfsráðgjafi er til aðstoðar við skipulag, tímastjórnun og almenna líðan: hringdu, sendu tölvupóst eða skilaboð á Teams – hægt er að fá fjarfund í gegnum Teams.

5) BÚÐU ÞÉR TIL AFDREP
Fyrir marga getur verið skrítið að þurfa að læra heima. Búðu þér til afdrep þar sem þú getur verið í friði við að sinna náminu, nokkurs konar vinnustöð. Reyndu að skipuleggja þig þannig að þú getir unnið í lotum, óáreitt/ur.

Áfram gakk!

Kæru nemendur, foreldrar og forráðamenn.

Við viljum minna á að þrátt fyrir að nemendur séu heima hjá sér þá heldur skólastarfið áfram.
Skólafulltrúi er venju samkvæmt í vinnu frá 8:30-12:30 og svarar í síma og tölvupóst. (464-6300 & gotta@laugar.is)

Þeir sem þurfa að ná í Maríu námsráðgjafa geta hringt í síma 464-6300, alla virka daga frá 8:30-12:30 og óskað eftir símatíma, sent tölvupóst á maria@laugar.is eða sent skilaboð í gegnum Teams.

Eins og við höfum áður nefnt er mikilvægt að nemendur haldi rútínu og sinni lærdómnum á vinnutíma, þ.e frá 9:10 – 15:30. Allar upplýsingar er varða námið koma inn á Moodle og/eða Teams og það er mikilvægt að nemendur fylgist vel með tilkynningum kennara.

Þrátt fyrir að nemendur geti ekki hitt kennara sína þá eru kennararnir við eins og á venjulegum skóladegi. Við hvetjum nemendur og foreldra/forráðamenn til þess að hafa samband við okkur hvort sem það eru fyrirspurnir varðandi námið eða einstök atriði.

Nemendur Laugaskóla standa frammi fyrir mikilli áskorun, hvað varðar ábyrgð og aga í námi og lífi, og nú er tíminn þar sem þið getið sýnt hvað raunverulega í ykkur býr. Við hjálpumst að við þetta og við hlökkum til að hitta ykkur að samkomubanni loknu.

 

Áríðandi tilkynning vegna COVID-19

Á blaðamannafundi sem haldinn var klukkan 11 í morgun tilkynnti Svandís Svavarsdóttir, heilbrigðisráðherra, að nú væri komið að því að setja á samkomubann og framhaldsskólum landsins verður lokað í 4 vikur vegna COVID-19. 

Það þýðir að skólastarf verður takmarkað hjá okkur frá og með mánudeginum 16. mars og næstu fjórar vikur. Bjössi skólastjóri kallaði nemendur og starfsfólk á fund kl 12 og fór yfir stöðuna hjá okkur.

  • Við létum nemendur vita að þeir þyrftu að fara heim til sín um helgina og munum við aðstoða þá ef þörf er á.
  • Nemendur eru komnir í fjarnám frá og með deginum í dag og kennarar munu hafa samband í gegnum kennsluvefi skólans.
  • Mikilvægt er að nemendur og forráðamenn fylgist vel með Innu, Moodle, tölvupósti og Teams. 
  • Nemendur eru beðnir um að ganga vel frá herbergjum sínum og muna eftir að taka með sér námsgögn.

Foreldar og forráðamenn fá sendar ítarlegri upplýsingar í tölvupósti. 

Rannsókn á smádýralífi við virkanir í Laxá í Þingeyjarsýslu

Guðmundur Smári

Í dag birtist grein eftir Guðmund Smára, raungreinakennara Laugaskóla, á vefnum Skólaþræðir.  Greinin fjallar um stórt verkefni nemenda á náttúruvísindabraut, en nemendur í áfanganum „Rannsóknarverkefni í Laxá“ hafa rannsakað smádýralíf við virkjanir í Laxá í Þingeyjarsveit síðastliðin tvö ár. Þessi rannsókn er virkilega spennandi og það er óhætt að segja að spennandi tímar séu framundan hjá nemendum náttúruvísindabrautar. Nemendurnir sem hafa staðið að þessari rannsókn munu fara á alþjóðlega ráðstefnu í júní nk. á vegum verkefnisins, til Flórída.

„ Á vorönn 2020 munu  nemendur sitja fimm eininga 4. þreps áfanga þar sem úrvinnsla á sýnunum verður kláruð og gögnin greind. Þá munu nemendur einnig skrifa vísindagrein, flytja fyrirlestur og útbúa veggspjald um verkefnið sem birt verður á ráðstefnu á vegum verkefnisins. Water is Life er alþjóðlegt verkefni þar sem yfir 30 framhaldsskólar frá öllum byggðum heimsálfum koma saman til að kynna verkefni sín og kynnast nemendum og verkefnum frá öðrum skólum. Öll eiga verkefnin sameiginlegt að fjalla á einhvern hátt um vatn, allt frá samfélagslegum og pólitískum áhrifum til þess hvernig vatn er undirstaða alls lífs sem við þekkjum. Framhaldsskólinn á Laugum er fyrsti og eini skólinn á Íslandi sem hefur tekið þátt í Water is Life verkefninu en fjórir nemendur ásamt verkefnastjóra munu fara til Flórída í júní 2020 til að taka þátt í ráðstefnu verkefnisins en annað hvert ár koma allir skólar saman til að kynna sín verkefni. Framhaldsskólinn á Laugum hefur einnig heimsótt skóla í Hollandi og Frakklandi sem eru þátttakendur í verkefninu til að kynnast þeirra verkefnum og skólum, en hollenski skólinn hefur líka sótt okkur hingað heim að Laugum.“ 

Kórónaveiran

Nú hefur ríkislögreglustjóri lýst yfir neyðarstigi almannavarna í samráði við sóttvarnalækni vegna sýkinga af völdum kórónaveiru, COVID-19, eins og fram kemur á vef Landlæknis. Þar kemur einnig fram að þetta neyðarstig hafi ekki teljandi áhrif á almenning og auk þess hefur ekki verið lagt á samkomubann.

Þar sem við erum heimavistarskóli og nemendur koma allstaðar að þá fylgjumst við vel með þróun mála. Það bendir ekkert til þess að veiran sé líklegri til að finnast í Laugaskóla heldur en annars staðar á landinu, en við munum greina frá því strax ásamt leiðbeiningum frá Almannavörnum og sóttvarnarlækni hvað skuli gera, ef hún greinist hér. Eins og annarsstaðar er líklegt að á næstu dögum/vikum muni einstaka nemendur/starfsmenn fara í sóttkví á meðan verið er að ganga úr skugga um hvort flenskueinkenni/veikindi séu COVID-19 eða eitthvað annað.

Við viljum enn og aftur minna á mikilvægi handþvottar og sprittunar. Við viljum hvetja nemendur og starfsfólk til þess að þvo sér vandlega um hendur með sápu áður en gengið er í matsalinn, og spritta hendur áður en þið fáið ykkur mat, glös og hnífapör, og strax þegar þið eruð búin að borða. Á vefsíðu Landlæknis má finna spurningar og svör við Kórónaveiruna.

Við reynum að láta faraldurinn trufla skólastarfið sem minnst en höfuð þó vaðið ávallt fyrir neðan okkur og tökum enga áhættu.

 

Tónkvíslarvika

Nú er undirbúningur fyrir Tónkvíslina í fullum gangi. Tónkvíslin fer fram í Íþróttamiðstöðinni á Laugum, laugardaginn 22. febrúar næstkomandi. Framkvæmdarstjórn Tónkvíslarinnar skipuleggur keppnina, en stjórnin er skipuð af nemendum Laugaskóla. Auk þess var Arna Kristín ráðin verkefnastjóri Tónkvíslarinnar, en það er í hennar verkahring að sjá til þess að allt fari samkvæmt áætlun, ásamt því að vera hægri hönd framkvæmdarstjórans.

Mugison verður skemmtikraftur kvöldsins. Hann er mörgum kunnugur hér á Laugum, enda fyrrum nemandi Laugaskóla.

Tónkvíslin hefur verið haldin í 15 ár og vex með hverju árinu. Þetta brýtur svo sannarlega upp hið daglega amstur alls samfélagsins á Laugum. Vikan fyrir keppnina fer í að setja upp svið og allt sem því tilheyrir fyrir keppnina. Þessa viku falla allir tímar Íþróttamiðstöðvarinnar í íþróttasal niður, því það þarf meðal annars að leggja sérstök teppi á gólfið ásamt drapperingum, setja upp ljósabúnað, gera sviðið tilbúið, skreyta og allt sem þarf til að halda þennan veglega viðburð.

Síðastliðin ár hefur keppnin verið í beinni útsendingu á N4, en í ár verður hún ekki sýnd í beinni útsendingu. Í ár munu nemendur taka virkari þátt í öllu sem kemur að keppninni, og munu nemendur til dæmis sjá um að taka upp alla keppnina, en útsendingarbíll frá Kukl verður á staðnum með myndavélum og öllu tilheyrandi.

Formlegt skólahald verður með óbreyttu sniði til hádegis á morgun, miðvikudag. En allir nemendur skólans taka þátt með einum eða öðrum hætti, og fá einingar fyrir það.

Miðakaup á Tónkvíslina fara fram á Tix.is og hvetjum við alla til að kaupa sér miða. Húsið opnar kl. 18:30 og keppnin hefst kl. 19:30. Hægt er að fylgjast nánar með undirbúningnum á Facebook-síðu Tónkvíslarinnar

Þorrablót og félagsvist

Þorrablót fór fram í gær, fimmtudaginn 6. febrúar í matsal skólans. Góð mæting var frá nemendum, og stjórnaði Lúðvík samkomunni, sem og fjöldasöng með aðstoð Systu. Talsvert var lagt í skemmtiatriði nemenda, en þeir fluttu grínmyndband sem var gert af myndbandsfélaginu Hnetunni. Bjössi skólastjóri var með spurningakeppni, þar sem svörin voru annað hvort já eða nei. Bríet Guðný sigraði spurningakeppnina eftir harða keppni við Guðrúnu Gísla.

Að loknu borðhaldi var spiluð félagsvist á níu borðum, undir stjórn Kristjáns G og Rögnu. Spilað var hálft spjald (tvær umferðir) og var Hafdís Hjaltalín efst kvenna en Guðmundur Gígjar karlamegin og hlutu þau bæði 92 stig. Af þessu var hin mesta skemmtan og kvöldið ánægjulegt.